محلى زينو اللحية زادت فيه الشطر. و ملي ولى باللحية ولى عينيه مايهزهاش في. هو ملوول ولى عندو لحية و من بعد زاد لبس حاجة بيضة طويلة تتكركر ايقولولها قميص. معاتش ايصبح علي كي نتعدى من قدامو و ماعاتش ايفدلك معاي كي ند خلو للحانوت باش نشري حاجة. و زادة وليت ديما نلقاه مسكر حانوتو و قاعد هو و اصحابو في القهوة. ابكلهم لحيتهم طويلة. قلك ولاو سلفين و باش ايطبقو اصول الدين. ايطبقوا على رواحهم هوما حرار. اما انا الي مهبلني توا كيفاش و اش باش نعمل باش يتلهى بي؟

معاتش يغزرلي ولى.  زعمة نلبس خمار و جلباب؟ ولى نلبس النقاب؟ اما نخاف ما يعرفنيش. توحشت ضحكتو و غزرتو المصرارة توحشت كيقلي » تفضل يا عسلة الدار دارك » و كي يقلي « ايا وقتاش نجي نخطب  » وانا نجاوبو « حتى نكونو و نعملو دار »

البارح دخلتلو للحانوت قتلو « تيفينك هالغيبة؟ » قلي  » السلام عليكم يا اخت الحمد لله » قتلو « شنوة صار ياخي ؟ » قالي « الحمد للله الذي انعم علينا ». غزرتو ت تبدلت و معاتش يضحك كيما قبل. اما باقي مدخلي ترينو في مخي و باقي كي نراه ندخل بعضي.

اكهو قررت: باش نلبس النقاب. بنات جيرانا برش لبسو. خير مني هوما؟