صبحت نغني تحت الدوش. حبي يتبدل يتجدد…نغني و نضحك على روحي مانيش مصدق.

ليوم صبحت شايخ و متفرهد. عندي الزهر.

حليت الراديون نسمع فلخبار. المذيعة متشاءمة ياسر. انا نرا فدنيا تضحك و مازالت بخير. حليت الشباك لقيت المطر تصب هههه ملا جو. نشوف في عباد تجري تحت المطر باش تخلط علمترو. كينشوف برشة ناس تعمل في نفس الحاجة نطمان…

خرجت ماشي لخدمتي, عرضني واحد نعرفو قلي  » منور صاحبي ضاهرلي فيك امورك هانية. كنت في كونجي تتخلع؟ »

تعديت قدام بياع النوار وقفت نتفرج و قربت نشم, شاخ علي البياع و قلي تشري قتلو اتو نرجعلك.

نكمل ثنيتي فرحان. ماذا بيا الناس الكلها تضحك و ماذا بي نشري الحلوى للصغار و نمد يدي للكبار.

وجيعة ظهري مانيش نحس بيها و ساقي طايرة بيا. فلمترو ماحشتيش باش نقعد. تفضل تفضل…

ناقف قدام بوتيك نتفرج نخمم نشري حوايج جدد عندي برشة مشريت شي جديد. ناقف نتفرج في روحي فلمراية نضحك و الله حلوة ضحكتي تبارك الله علية.

توحشتها لازمني نكلمها. زعمة تقبل نفطرو مع بعضنا ليوم؟ نشد التاليفون و بعد نبطل. زعمة تقبل؟

هاذي هي الي حكاتلي عليها الدقازة.

يا معذبتني بزينك اش بين قلبي و بيينكḷ